ايام ابتدائى كنت بعرف ارسم.. او الناس كانت بتقول لى كدة. عمرى ما شفت انى بعرف ارسم.. كلها كانت فى نظرى عبارة عن شخابيط ملونة.. وحتى اختيارات الالوان عندى طول عمرها اعجب من بعض.. فى مرة حتى فكرت ان اكيد يا عندى يا عند الناس عمى الوان..
ويمكن حتى طول الفترة دى ما صدقت انى بعرف ارسم الا فى أواخر الاعدادية واوائل الثانوية… لما بدأت استخدم الفحم والقلم الرصاص..
بُعد تانى للصورة لما تبقى ابيض واسود ورمادى.. كانها صورة لعزف منفرد.. من غير لا بهرجة ولا دوشة ولا زحمة ولا وجع دماغ الالوان..
لوحة.. لوحتين.. تلاتة.. وبدأت أصدق.. أنا فعلا بعرف ارسم.. ومن ساعتها وبطلت..
كل واحد فينا محتاج يحس كل لحظة بشئ يميزه عن حد.. ذكاء.. ثقافة.. موهبة.. او حتى جمال او لباقة..
بنفضل طول عمرنا ندور على ركن نبان فيه وسط الصورة.. واوقات كتير رغم قربه لينا، بنعمى عنه.. معرفش السبب فينا لاننا مش مؤمنين بنفسنا للدرجة اللى تخلينا رغم كل الظروف نصدق ان فينا شئ مميز.. طب هى ثقة بالنفس؟.. ولا المشكلة فى تأثير غيرنا علينا.. ولا مجرد نماذج تانية شفناها خلتنا نفقد كل إيماننا بان ممكن يكون فينا شئ يستحق..
النهاردة مسكت القلم احاول ارسم بعد اكتر من اربع سنين انقطاع… ومعرفتش اجر خط.. زى ما اكون نسيت القلم بيتمسك ازاى… وازاى الخط بيتخط..
لاء.. هو مش ندمانة انى هجرت الرسم.. لان عمرى ما حبيت انى ارسم.. كان دايما يطلع فى حالة ضيق او غضب.. لكن ندمانة ان عمرى ما صدقت ان ممكن كان يبقى منى شئ.. ولو اى شئ..
كان ممكن.. وانا طنشت..
1 Trackbacks
You can leave a trackback using this URL: http://lastoadri.com/blog/archives/328/trackback/
[...] تسجيلات صوتية – قول للزمان ارجع.. مارجعش محاولة لإحياء حلم قديم لتسجيل بعض ما أكتب بصوتي.. كبداية، اخترت تدوينة قديمة كتبتها في عام 2007 تحت عنوان “قول للزمان ارجع.. مارجعش“.. [...]
17 Comments
كعادتك
تدوينة جميلة وذات عمق
تتكلم عن أشياء بتحصل داخلنا بس مع زحمة الحياة كثير ما ننتبه لها
=
طبعا “كعادتك”
لأنو صار لي حول 3 شهور أتابع مدونتك
وبيني وبينك هي من المدونات القليلة اللي بأخر قرأتها لوقت الروقان
تحياتي
من كام شهر كنت بتكلم مع حد أعرفه عن مدونتك وكنت بقول إني مش حاببها رغم إعجاب أكتر من شخص بثق في رأيه بيها .. وإنها بالنسبة لي مش من الأماكن المميزة اللي بلاقي نفسي فيها زي مدونات تانية
بس في الفترة اللي فاتت – اللي بتمتد لشهرين تقريباً – مش عارف فيه حاجة اتغيرت فيكِ أو في المكان .. ولا مجرد استقبالي ليه ، بس اللي أعرفه فعلاً إن كل تدوينة مستني أكتر من اللي قبلها .. كلام كتير اتقال عبـَّر عن خزعبلات أنا مقتنع بيها جداً .. وفي كل مرة كنت بدخل هنا كان الكلام بيرسم بالنسبة لي ( حد ) مهتم بإني أسمعه مش مجرد موقف عابر بقراه وأنا بشوف المدونات ..
التدوينة اللي حضرتك كتباها دي قريتها بعد ساعة وشوية من كلامي مع واحد صاحبي عن نفس الموضوع .. كنت بقوله إننا لازم نآمن بنفسنا ونصدق قدرتنا على إننا نعمل حاجة عشان الدنيا نفسها تصدقنا .. وإن الرحلة على مدار عمر كامل بتتحول مع الوقت من كونها وسيلة توصلنا لشيء أكبر .. لإنها غاية في حد ذاتها ، بكل آلامها ومصاعبها وفرحتها .. بكل الناس – واللي مش ناس – اللي قبلناهم فيها ..
مجملاً بفتكر دايماً كلمة جون ميدين اللي كتبها على غلاف “بروف” :
If you don’t believe in yourself, who will believe in you?
يمكن عشان كده تدوينتك سابت أثر حقيقي جداً جوايا
الكومينت ده مش تعليق على بوست قد ما هو تسجيل من حقك تعرفيه .. إن المكان ده من أكتر الأماكن اللي بلاقي نفسي فيها حالياً .. بكل الشجن .. والبراءة .. والصدق اللي فيه .. مجملاً : الكلام المكتوب هنا تخطى بالنسبة لي مرحلة إنه ( كلام ) وبقى حاجة أهم
علي فكره اخر تلات بوستا عميقه جدا وعجباني جدا واشترك مع التعليق السابق في كل ما ذكر
حاولي ترسمي تاني وحاولي تتعلمي لغه
علي فكره احيانا بعد فترة التدوين بيجيب كابه حددي عدد ساعات محدد للنت والباقي اطلعي للعالم واتعلمي اي حاجه جديده انشالله كورسات مطبخ
وهتفرق كتير جدا
عن تجربه
تحياتي
شوفي يابلو كل تدويناتك صراحة بتمس حاجة جوايا
وبتكتبي عن حاجة بافكر فيها او كنت باتكلم فيها مع حد
من كام يوم كنا بنتكلم عن الكسل وهل نحن كسولين وباقي الامور المتعلقة بالكلام ده
خصوصا لما يكون الكسل صفة ابتدت تظهر اعراضها على ناس عندهم مواهب كتيرة ولهم هوايات اكتر
وكان رايي في حكاية الكسل ده ان فيه سببين لهروبنا من الحاجات اللى بنحبها وركوننا للكسل
سبب خارجي
وسبب داخلي
الخارجي خاص بالمحيطين بنا واللى بيكسروا مجاديفنا سواء بقصد او بدون قصد
المهم ان تعليقاتهم على مانهتم او نحب دائما ماتترك اثر سلبي علينا والاثر السلبي مرتبط بالسبب الداخلي وهو قلة ايماننا بذواتنا وبأننا نقدر نعمل حاجة او بنعرف نعمل حاجة مختلفة عن اللى يعرفه غيرنا
وده اهم جزء في الموضوع
يعني لو ايماننا بذواتنا كبير صعب أراء الغير فينا تحبطنا أو تكسر حاجة جوانا
وممارسة الهوايات من الامور اللى بتزود احساسنا بذاتنا وبتخلينا نحس اننا مبدعين
حاولي تعيدي ممارسة بعض الهوايات اللى تركتيها من فترة
صحيح في البداية ح تلاقي صعوبة لان الواحد بيكون عامل زي الآلة المصدية من كتر الركنة
لكن شوية صنفرة بتجيب نتيجة كويسة جدا
وحاولي كمان تتعلمي حاجة جديدة
وعارفة كمان
هو رأي شرير شوية بس انا جربته ولقيته كويس
لو لك معارف او اصدقاء من العينة اللى بتحب تكسر المجاديف حاولي ماتتكلميش معاهم عن هواياتك وبتحبي تعملي ايه او نفسك تعملي ايه
لان غالبا لو لهم اهتمامات مختلفة او من غير اهتمامات صعب تلاقي منهم تجاوب او تشجيع
اجعلي مهمة التشجيع والدعم المعنوي دي مهمتك الاولى تجاه نفسك وتجاه من تريهم من اصدقاءك محتاجين دعم معنوي
لان دعمك لهم سينعكس بالايجاب على حالتك المعنوية التي سترتفع بالتأكيد نتيجة ارتفاع معنوياتهم بوجودك بجوارهم
وهكذا ستجدي من يقف بجانبك ويدعمك معنويا
تحياتي
الحد اللي كان بيكلمه محمد من كام شهر ده يبقى أنا
:)
المهم
فعلا حياة ممكن تقضي على مواهب كتير جوانا
زحمة الحياة أقصد ضغطها على الواحد ممكن يكون قاتل لمشاعو و أحاسيس و مواهب
في أغنية لمحمد منير بيقول و كل شيء بينسرق مني أعتقد إنه أحسن تعبير إن حاجات كتير ممكن تكون مهمة في وقت ما تتسرق و يحل محلها حاجة في زحمة الحياة
لو مشعارفه تمسكى القلم تانى ممكن تفتحى الفوتوشوب .. انا بقيت بعمل كده
بعشق الرسم …وطول عمري وأنا مش بعرف أرسم …وطول عمري وأنا نفسي أرسم … أنا بدأت أرسم وأنا في 3 ثانوي يعني بالظبت من سنتين ….وأتقدمت كتير …وفعلا الرسم بالفحم والرصاص أحلى بكتير من الرسم بالألوان … الفحم والرصاص بيخلينا نفحص الخطوط والظل وندقق في الرسمه أما الألوان فبتدينا الانطباع الأول يا حلو يا وحش ,,,يعني مش بتخلينا نقرب اكتر من الرسمه :)
أنا جيت هنا كذا مره …والإحساس اللي بيوصلني دايماً …إن مدونتكـ سكون وسط الزحام بحسك هنا عالم تاني ….مش عارفه ايه السر !!؟؟
كنت بفكر في حاجة مشابهة من يومين بالأخص في موضوع محاولاتنا الدائمة أن أحنا نثبت لنفسنا أن عندنا قيمة مميزة….بس آلي كان بيلح علي هو أن الأشخاص آلي عندهم أمكانيات كتيرة بيكون دتئماً عندهم فرصة لبلوغ هذه ارغبة، لكن أيه حال الشخص آلي مكانياته فعلاً محدودة…هل بيفضل طول عمره يبحث عن هذا الشعور لا يجده…ولا بييأس…ولا بيكون ناضج أكتر من باقي الناس….
أكيد بتختلف من شخص لشخص بس لازال السؤال يطرح نفسه علي…
أكيد انتي لسه ممكن ترسمي تاني
واكيد رسمك هيبقي جميل اوووووي
امسكي القلم تاني
واحده واحده وهتفتكري كل حاجه
لأنها كانت موهبه جواكي اصلا
فبلاش تضيعيها
حاولي تاني وتالت وخامس
ساعات بنحتاج نعرف ان ممكن يكون فينا حاجة علشان الحياة تستمر
ساعات بنكون متاكدين اننا حاجة لكن للاسف بنكون بنضحك على روحنا علشان نخبى خيبتنا حتى عن نفسنا
لكن لما بنقف قدام روحنا بجد بنعرف اد ايه احنا فينا حاجات كثير ما كناش عارفنها
صدقينى حتى لو ما عرقتيش تخطي خط لكن كلماتك كانت معبرة اكثر من الف صورة ومليون خط
فيكي حاجات كثير بس المهم تواجهى نفسك هتعرفى قد ايه انت غنيه بامكاناتك المخفيه
تحياتى
بداية بس احب اقول انه دى من اصعب التعليقات اللى قراتها عندى
:)
ومش عارفة ان كنت استاهل كل دا ولا لاء.. بس اكيد كل واحد فيكم يستهال اكتر من كدا بكتير على كلامكم اللى يملى القلب تفاريح
@mo93abs
تسلم لى… انت ماتعرفشى الكام كلة اللى ممكن حد.. اى حد يتركهم فى تعليق ويمشى بيأثر فيا قد ايه
خصوصا لما يكون كلام يلمس شئ انسانى جوايا
:)
بس انت مش عامل مدونة ليه؟
@محمد المصرى
مش عارفة يا محمد اقول لك ايه
انت عارف ان كلامك من اكبرامنياتى
انى اسيب علامة فى اى حد
خلينا اقول لك شكرا على احلى صباح رسمتهولى النهاردة.. ولو كانت شوية متأخرة
:)
@بنت القمر
فعلا بتعلم فرنساوى من اول وجديد دلوقتى
عايزة اكتشف العالم من منظور جديد.. ومايضرش لو نفع فى الشغل يعنى
;)
والطبخ بحاول فيه برضو.. بس على قدى بقى
امانى… انا بقدرك كمدونة صديقة قوى على فكرة
@Bella
بللا الجميلة
بس انا من النوع اللى بيقدر المساعدة الخارجية عن الداخلية
اه بمنى نفسى اتوحد مع نفسى ضد باقى البشر.. بس احنا مش على وفاق.. وبياثر فينا اللى بيتقال
عارفة انه تفكير سيئ…
مش ح وعدك.. بس ح حاول
:)
@يحي المصرى
تصدق يا يحى.. كنت متاكدة انه انت معرفشى ليه
:D
بس دايما رافع معنوياتى كدة.. يكرمك يا رب
وهو يمكن يكون سرقة.. بس مع اشراف صاحب البيت
:(
@Bahz Baih
:D
ماهو الموضوع مش رسم بمعنى الرسم
عموما بقى
وبعدين الفوتوشوب دا مستفز.. مابعرفشى ارسم عليه!
@Batresya
همم.. لما بدأت اكتب بجد.. كان فى فكرى يكون مكان بعيد عن الدنيا
اللى يجى هنا يرمى كل الافكار السيئة فى الدينا.. يبعدها بعيد ويفكر شوية كانسان.. مش اكتر ولا اقل
والرسم على فكرة ممارسة وحب
كنت زمان بصور كتب فى الرسم واقلدها.. ايام الروقان بقى
بتفيد بشكل كبير جدا
واتمنالك كل الخير فيه ان شاء الله
:)
@the eyewitness
واشمعنى بيكون ناضج عن غيره؟
هو الموضوع دلوقتى (فى راى الشخصى) مثابرة وفرصة
فى كتير عندهم امكانيات بس مافيش فرص… بيفضلوا مميزين لنفسهم ويجيلهم اكتئاب
مش عارفة يا تونى الفكرة ايه بالظبط.. لو ممكن توضحهالى شوية اكتر
@esraa
مابقاش عندى نفس يا اسراء
هو شئ محبط… بس ماكنتش بحب الرسم
بس يمكن فى العموم احاول.. وليه لا
@maksofa
حاضر
:)
@sokomonoce
صباحك شوكلاتة بالبندق يا سيكومونوس
عندك حق.. ودا اللى نفسى الناس وانا قبلهم.. نشوفه
الدنيا مابتقفشى على حاجة او حد
:)
فعلا.. من أفضل التعليقات التي قرأتها، خصوصا تعليق بيلا، وده سبب امتناعي عن التعليق، خصوصا انك فكرتيني بهوايتي المفقودة العزف على الجيتار
:’)
مش عارفة أقولك إية
لكن العزيز محمد المصرى قال اللى نفسى أقوله ..
كوبى بست لرده ..
مش عارفة لية فى اللحظة دى بالذات ..
عايزة أقولك إنى بحبك جدا ..
والله مش عارفة لية ..و ممكن تكون مش صحيحة و بكرة الكلمة تتغير
لكن أنا حاليا فى الثانية دى ..مبسوطة بيكى و بكلامك و بمدونتك
و لسه مش عارفة لية
…
محمد هو اللى صحى فيا الحكاية دى
…
كملى يا بلو ..
:)
على فكرة انا كمان كان عندى حاجات كتير تركتها
لا اعرف تركتها برضايا ولا من غير ماعرف
لكنى على العكس ندمان على ذلك كثيرا
هو الناس مش بتتساوى فى المواهب و الصفات. يعنى فى دايماً درجات من التميز ، أنا ممكن أذكى من واحد وواحد تانى ممكن يكون أذكى منى وهكذا. المهم إن المجموع فى الآخر هو اللي بيعمل الواحد وبتلاقى إن حتى بقايا موهبة ما لم تمارسيها بدرجة كافية بتظهر لها بصمة ولو خفيفة فى أسلوب حياتك بصفة عامة. طبعاً ده مش بينفى إن فى ناس بيكونوا فعلاً مميزين زيادة شوية فى خاصية معينة بس ده شىء برضه غالباً يقابله قصور فى خاصية أخرى
اللي عايز أقوله إنه ظهور الواحد فى ركن ما فى وسط الصورة بيقابله أيضاً ظهور الواحد فى أكثر من ركن من الصورة مع إختلاف درجة الظهور.. أهم حاجة رضانا عن نفسنا عن حق مش وهم
Blue, as usual, I loved the post and felt you are writing what I feel inside.. Actually, as most of the people commented, the same thought was going through my mind.. I was thinking, why do people see things in me that I don’t see, and wondered is it possible that people around believe in me more than I believe in myself!
Talking of drawing b2a, I used to draw when I was at school.. wasn’t a professional, however I just loved it.. it wasn’t important that I have a great output as much as I loved the process of drawing in itself..
Couple of weeks ago, I took the decision that I should be back to drawing again and started to take art classes.. just to oblige myself to cut out these couple of hours from my day and do nothing but draw and paint.. got to tell you that it really made a difference.